Монгол Улсын Ерөнхийлөгч Халтмаагийн Баттулга сар шинийн босгон дээр зарлиг гаргаж салбар салбартаа ажиллаж гавъяа байгуулсан хүмүүст төрийн дээд одонгоор шагналаа.
Үүнд олон улсын жүдо бөхийн холбооны олимпийн зэрэглэлийн шүүгч Машбатын Бөхбат, 3x3 сагсан бөмбөгийн Үндэсний шигшээ багийн ерөнхий дасгалжуулагч, сагсан бөмбөгийн хөгжил хариуцсан захирал Сүхбаатарын Тулга нар Монгол Улсын гавъяат дасгалжуулагч цолоор шагнагдсан байна. М.Бөхбат нь Монголын жүдо бөхийн холбооны гүйцэтгэх захиралаар 2006-2019 хүртэл тасралтгүй үр бүтээлтэй ажилласан бөгөөд анхны олимпийн зэрэглэлийн шүүгч юм. Тэрбээр "Рио-2016" олимпод шүүгчээр ажилласан бол өдгөө Монголын тууланы урлаг, тулалдааны спортын зөвлөлийн ерөнхийлөгчөөр ажиллаж байна. Харин С.Тулга нь багийн спортын түүхэнд анхны олимпийн эрхийг авсан бөгөөд түүний дасгалжуулсан эмэгтэй баг "Токио-2020" олимпод оролцохоор болсон билээ. Мөн түүний дасгалжуулж буй эрэгтэй шигшээ баг олимпийн эрхийн тэмцээнүүдэд оролцохоор бэлтгэл сургуулилтаа базааж байгаа юм.
