Түрээсийн орон сууцны бүртгэл өнөөдөр 00:00 цагт дуусна

Нийслэлийн Орон сууцны корпорациас “Буянт-Ухаа 2” 972 орон сууцны хороололд хамруулах цахим бүртгэл өнөөдөр /2019.08.04/ шөнө 00.00 цагт хаагдана гэдгийг албан ёсоор мэдээллээ.

Тус корпорацийн мэдээлснээр түрээсийн орон сууцанд орох хүсэлтэй иргэд олон байгаа бөгөөд наймдугаар сарын 02-ны өдрийн 09.00 цагийн байдлаар нийт 29,538 иргэн өөрийн хүсэлтээ өгч анкетаа баталгаажуулсан байна. Иймээс иргэн та Түрээсийн орон сууцны цахим бүртгэлд хамрагдах хүсэлтэй бол дараах зүйлийг анхаарах ёстой. Тодруулбал, түрээсийн орон сууцанд бүртгүүлэх анкет бөглөхдөө юуг анхаарах ёстойг танилцуулъя. Үүнд: 

  • Та зөвхөн суурин компьютероор бүртгэл хийх боломжтой
  • Анкетыг кирилл үсгээр үг, өгүүлбэр товчлохгүйгээр бичнэ
  • Урд талдаа улаан чагт тэмдэглэгээтэй хэсгийн мэдээллийг заавал бөглөнө
  • Тоон тэмдэглэгээ хийх хэсэгт зөвхөн тоо, үсгэн мэдээлэл бичих хэсэгт үсгэн тэмдэглэгээ хийнэ
  • Иргэн та зөвхөн нэг удаа бүртгэл хийх боломжтой тул өөрт тохирох зөв ангиллыг сонгоно уу
  • Та анкетаа бөглөөд хадгалах товчийг дарснаар дахин мэдээллээ засварлах боломжгүйг анхаарна уу

Хүсэлт гаргагч нь анкетыг үнэн зөв бөглөх ёстой. Хэрэв худал мэдээлэл бүртгүүлсэн бол мэдээллийн сангийн хар жагсаалтад орж, сонгон шалгаруулалтад оролцох боломжгүй.

Өмнө нь захирагчийн ажлын алба, Ахмадын орон сууц болон дүүрэг хороонд орон сууцанд хамрагдах хүсэлт гаргасан иргэд дараалал харгалзахгүй дахин цахим бүртгэлд хамрагдах шаардлагатай. Хэрэв нууц үгээ мартсан тохиолдолд нууц үгээ мартсан хэсэгт хандан өөрийн и-мэйл хаягаар сэргээлгэн авах боломжтой. Аль алийг нь мартсан бол иргэний цахим үнэмлэхтэйгээ нийслэлийн нэг цэгийн үйлчилгээний Мишээл салбарт өргөдлөө бичин, цахим үнэмлэхийн хамт хандаж сэргээнэ. 

Дашрамд мэдээлэхэд бүртгэлийг цахим хэлбэрт шилжүүлэн ажилласнаар иргэд бүртгэлийн явцыг ил тод, нээлттэй, цаг тухай бүрт нь хүлээн авахаас гадна давхар хяналт тавих боломж бүрдэнэ. Мөн Цахим бүртгэлийг энгийн түрээс болон түрээслээд өмчлөх гэсэн хоёр хэлбэрээр зорилтот найман бүлгийн иргэд хамрагдах боломжтой. Үүнд, ахмад настан, төрийн албан хаагч, залуу гэр бүл, хувийн байгууллагын ажиллагсад болон хувиараа хөдөлмөр эрхлэгч, 18 хүртэлх насны дөрөв ба түүнээс дээш хүүхэдтэй гэр бүл, хөгжлийн бэрхшээлтэй иргэн болон түүнийг халамжилдаг гэр бүл, гамшигт аюул үзэгдлийн улмаас орон гэргүй болсон иргэд гэсэн бүлгийн иргэд хүсэлтээ бүртгүүлэх аж.