Чөлөөт бөхийн 2019 оны насанд хүрэгчдийн Улсын аварга шалгаруулах тэмцээн өнөөдөр Сонгинохайрхан дүүргийн спорт хорооны зааланд эхэллээ. Энэ жилийн улсын аварга тамирчид есдүгээр сард Казахстаны Нур-Султан хотод болох ДАШТ-д оролцох эрх авах юм. Эрэгтэйчүүдийн 56, эмэгтэйчүүдийн 21 дэх удаагийн тэмцээн өнөөдөр эрэгтэйчүүдийн 57, 65, 70, 79, 92, эмэгтэйчүүдийн 50, 55, 57, 68, 76 кг-ын жингийн барилдаанаар эхэлсэн.
Өнөөдрийн хамгийн анхаарал татсан, шуугиантай барилдаан эмэгтэйчүүдийн 68 кг-д “Лондон-2012” олимпийн наадмын хүрэл медальт, дэлхийн хошой аварга, хөдөлмөрийн баатар Соронзонболдын Батцэцэг, ДАШТ-ий нэг мөнгө, гурван хүрэл медальт, гавьяат тамирчин Очирбатын Насанбурмаа нарын барилдаан байлаа. Хэн ялсан нь “Токио-2020” олимпийн наадмын эрхийн төлөө эх орноо төлөөлөн Казахстаныг зорих эрх авах ёстой байлаа. Тэд хамгийн сүүлд 2012 онд “Монголиа Опен” ОУТ болон УАШТ-д таарч барилдахад С.Батцэцэг ялж Лондоны олимпийг зорьж байв. Тэгвэл долоон жилийн дараах уулзалтад С.Батцэцэг хүчтэй өрсөлдөгчөө 6:5-аар яллаа.
Өнөөдрийн барилдаанд эрэгтэйчүүдийн 70 кг-д “Лас-Вегас-2015” ДАШТ-ий мөнгөн медальт, гавьяат тамирчин Батболдын Номин “Ирээдүй” цогцолборын тамирчин Ч.Сүрэнжавт ялагдан медалиас мултарлаа. Дээрх 10 жингийн хагас шигшээ барилдаан нээлтийн ёслолын ажиллагааны дараа, медалийн төлөөх барилдаан маргааш болно.
