УИХ дахь МАН-ын бүлэг болон АН-ын зөвлөл өнөөдөр хуваарийн дагуу хуралдана. МАН-ын бүлэг Сонгуулийн тухай хуульд нэмэлт, өөрчөлт оруулах тухай хуулийн төслийн танилцуулга болон Захиргааны ерөнхий хуульд өөрчлөлт оруулах тухай хуульд тавьсан Ерөнхийлөгчийг хоригийг тус тус хэлэлцэх аж. Үүнээс гадна УИХ-аар энэ долоо хоногт хэлэлцэх зарим асуудлыг хэлэлцэхээр товложээ.
Харин Ардчилсан намын зөвлөл энэ долоо хоногт УИХ-аар хэлэлцэх асуудал болон бусад асуудлыг хэлэлцэхээр болсон байна. Түүнчлэн өнөөдөр дараах ажлын хэсгүүд хуралдана. Үүнд:
- Монгол Улсын Үндсэн хуульд оруулах нэмэлт, өөрчлөлтийн төсөл боловсруулах үүрэг бүхий Улсын Их Хурлын даргын 2017 оны 78 дугаар захирамжаар байгуулагдсан ажлын хэсгийн хуралдаан 13.30 цагаас Улсын Их Хурлын даргын хурлын өрөөнд;
- Жижиг, дунд үйлдвэр, үйлчилгээг дэмжих тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг нэгдсэн хуралдаанаар хэлэлцүүлэх бэлтгэл хангах, санал, дүгнэлтийн төсөл боловсруулах үүрэг бүхий Эдийн засгийн байнгын хорооны ажлын хэсгийн хуралдаан 14.00 цагаас “В” танхимд;
- Улсын Их Хурлын стратеги төлөвлөгөөг шинэчлэн боловсруулах үүрэг бүхий ажлын дэд хэсгийн хуралдаан 14.00 цагаас “Г” танхимд;
- Монгол Улсын Ерөнхийлөгчийн болон Улсын Их Хурал, аймаг, нийслэл, сум, дүүргийн иргэдийн Төлөөлөгчдийн Хурлын сонгуулийн тухай хууль тогтоомжийн төслийг боловсруулж, Улсын Их Хуралд өргөн мэдүүлэх үүрэг бүхий Улсын Их Хурлын даргын захирамжаар байгуулагдсан ажлын хэсгийн хуралдаан 16.00 цагаас Улсын Их Хурлын дэд дарга Л.Энх-Амгалангийн өрөөнд тус тус хуралдах аж.
