О.Баасанхүү: Г.Батхүү агсныг унасан байхыг анх харсан.  Нөхцөл байдлыг баримтжуулж, цагдаагийн байгууллагад өгсөн

АН-ын дэд дарга Г.Батхүү хэд хоногийн өмнө Төрийн ордонд харамсалтайгаар амиа алдсан. Тэгвэл энэ асуудалтай холбоотойгоор УИХ-ын гишүүн О.Баасанхүү өнөөдөр мэдээлэл хийлээ. Ингэхдээ тэрбээр энэ мэдээллээ  ар гэрийнхнээс нь зөвшөөрөл авсны дагуу хийж буй хэмээсэн бөгөөд "Төрийн ордны нэг давхарт АН-ын дэд дарга Г.Батхүү агсан амиа алдсанд гүнээ харамсаж байна. Өчигдөр би ар гэрийнхнээс нь зөвшөөрөл авснаас гадна Цагдаагийн байгууллагаас Шүүх шинжилгээний үндэсний төвөөс талийгаачийн дүгнэлт нь гарч байгаа гэсэн учраас мэдээлэл хийж байна. Мөн сэтгүүлчдийн зүгээс буруу зөрүү, мэдээллийг бусдад түгээж байна гэсэн мэдээлэл ирсэн учраас нөхцөл байдлын талаар зайлшгүй мэдээлэл өгөх нь зөв болов уу гэж үзлээ" гэсэн.

Тэрбээр цааш нь "Миний өрөө тухайн хэрэг болсон газрын наад талын өрөө гэсэн үг. Тэр өдөр чуулганы хуралдаан 18.00 цагт тараад, өрөөндөө хүмүүстэй уулзчихаад ордны баруун жигүүрийн нэг давхраар явж байтал нэг хүн газар хэвтэж байсан. Би шууд хараад Г.Батхүү агсныг гэж таниагүй. Яг хэдэн цаг минутад тэр хүнийг харснаа хэлж болохгүй. Учир нь мөрдөн шалгах ажиллагаанд саад учруулахгүй нь тулд. Талийгаач тухайн үед толгойдоо гэмтэл авсан уу, үгүй юу гэдгийг би бас мэдэхгүй. Ямартаа ч миний харснаар унасан хүний толгой нь орчим нэлэнхийдээ цус болсон бөгөөд хамар амнаас нь цус гарсан байсан. Ингээд би шууд Тагнуулын ерөнхий газарт мэдэгдсэн. Энэ нь ч учиртай. Яагаад гэвэл Төрийн ордон бол төрийн тусгай хамгаалалттай газар. Хуулиараа хамгаалуулдаг. Би өөрөө хуульч хүн учраас ийм тохиолдолд хаашаа хандах вэ, ямар арга хэмжээ авах вэ гэдгээ гадарлана. Би хуульч, 20 гаруй жил Эрүүгийн хэргийн хавтаст хэрэг, материалуудтай танилцаж байсан хүний хувьд авах ёстой арга хэмжээ нь юу вэ гэдэг утгаар зохих арга хэмжээг авсан. Тагнуул өөрсдөө цагдаагийн байгууллагад мэдэгдэх журмын дагуу мэдэгдсэн. Ингээд намайг мэдээлэл өгсний дараа 103 ирсэн. Тэд үзлэг хийгээд нас барсан байна гэдгийг тогтоосон. Цагдаагийн байгууллага угаасаа хоцорч ирэх нь тодорхой учраас би нөхцөл байдлыг баримтжуулж, фото зургийг нь авч тэр зургаа цагдаагийн байгууллагад хүлээлгэн өгсөн" гэлээ.

-Ямар нэгэн дуу чимээ сонсогдсон уу?

-Би дахин хэлье. Манай өрөөнд дуу чимээ сонсогдохгүй. Яагаад гэвэл манай өрөө хоёр давхар өрөө, дээрээс нь давхар хаалгатай. 111 номер буюу хэрэг учрал болсон газрын наад талын өрөө. Би өрөөнөөсөө гараад унасан байхыг нь харсан. Тэр өглөө Засгийн газрын хуралдаан болсон. Дараа нь ямар нэг юм болсон юм болов уу гэж урьдчилсан таамаглалаа хэлсэн. Хуулийн байгууллага гадны нөлөөтэй байсан уу, үгүй юу гэдгийг тогтоож байгаа байх.

-Хэдэн цагт та дуудлага өгсөн бэ?

-Мөрдөн шалгах ажиллагаанд саад учруулахгүйн тулд цаг, минутыг хэлэх боломжгүй.