Өнөөдөр Германы Дюссельдорф хотноо Олон улсын жүдо бөхийн холбооны Гранд Слам тэмцээн эхэллээ. Тэмцээн уламжлал ёсоор хөнгөн жингийн барилдаануудаар эхлэж, эрэгтэй -60, -66, эмэгтэй -48, -52, -57 кг-ын жингийн медалийн төлөө өрсөлдөх тамирчдын нэрс тодорлоо. Дюссельдорфийн “Их дуулга”-ын эхний өдөр манай таван жүдоч д өрсөлдөх гурав нь медалийн төлөө өрсөлдөх эрхтэй боллоо.
Эмэгтэйчүүдийн -52 кг-ын жинд Баянхонгор аймгийн Эрдэнэцогт сумын харьяат залуучуудын олимпийн мөнгөн медальт, 2019 оны Монгол Улсын аваргын шилдэг жүдоч Лхагвасүрэнгийн Сосорбарам "Их дуулга" ангилалд анх удаагаа аваргын төлөө өрсөлдөхөөр шалгаран үлдээд байна. Тэрбээр эхний тойрогтоо гоц мөргөөд хоёрын даваандаа Хонгконгийн Цуй Шүк Киг 1:45 минута өчих мэхээр цэвэр, гуравдугаар тойрогт Туркийн Ирэм Коркмазыг 3:20 минутад мөн өчих мэхээр цэвэр ялсан. Улмаар “В” группын аваргын төлөө Францын Астрид Гнетог нэмэлт цагт торгуулиар ялсан бол хагас шигшээд Японы Кишима Маедаг хоёр вазаригаар буюу цэвэр ялж финалд шалгарлаа. Ингэснээр тэрбээр 17 насандаа Гранд Слам ангилалд финалд шалгарсан манай анхны жүдоч боллоо. Тэрбээр аваргын төлөө олимп, дэлхийн аварга Косовогийн Малинда Кельмендитэй барилдана.
Мөн энэ өдөр -57 кг-ын жинд олимпийн наадмын мөнгө, дэлхийн аварга, ДАШТ-ий хошой хүрэл медальт, хөдөлмөрийн баатар Доржсүрэнгийн Сумъяа, -66 кг-д ОУХМ Ёндонпэрэнлэйгийн Басхүү нар хүрэл медалийн төлөө өрсөлдөхөөр болсон.
Д.Сумъяа эхлээд Австрийн Сабрина Филзмоузерийг 2:38 минутад цэвэр, дараа нь БНХАУ-ын Лу Тонжуаныг торгуулиар ялжээ. Улмаар “С” хэсгийн аваргын төлөө Францын Сара Леони Сайскег вазаригаар ялсан ч хагас шигшээд Рафаэла Сильвад барилдааны төгсгөлд вазари үнэлгээ алдснаар ялагдал хүлээсэн байна. Тэрбээр хүрэл медалийн төлөө Польшийн Анна Боровскатай хүч үзнэ.
Харин -66 кг-ын жинд хүч үзсэн Завхан аймгийн Нөмрөг сумын харьяат, “Хилчин” спорт хорооны тамирчин ОУХМ Ё.Басхүү эхлээд Гвиней-Биссаугийн Диого Цезарыг вазаригаар, дараа нь Алжирын Уайл Эззинег 42 секундэд цэвэр, гуравдугаар тойрогтоо ДАШТ-ий хүрэл медальт Израйлын Таль Фликерийг нэмэлт цагт торгуулиар ялсан бол “С” хэсгийн аваргын төлөө ОХУ-ын Якуб Шамиловт нэмэлт цагт ялагдал хүлээсэн. Улмаар торгуулийн тойрогт Казахстаны Ессет Куановыг нэмэлт цагт ялснаар Парисын “Их дуулга” тэмцээний аварга Молдавын Денис Вьерутай хүрэл медалийн төлөө өрсөлдөхөөр боллоо.
