“Баку-2018” жүдо бөхийн ДАШТ-ий гурав дахь өдөр эрэгтэйчүүдийн 73 кг, эмэгтэйчүүдийн 57 кг-ын жингийн барилдаанууд болж Монгол Улс эхний медалиа авлаа. Энэ өдөр манай дөрвөн бөх хүч үзснээс гурав нь медалийн төлөө өрсөлдөж эмэгтэйчүүдийн 57 кг-ын жинд ХХЕГ-ын “Хилчин” спорт хорооны тамирчин Монгол Улсын хөдөлмөрийн баатар Доржсүрэнгийн Сумъяа хүрэл медаль хүртлээ. Тэрбээр Сербийн Жована Рогичийг нэмэлт цагт даралтаар цэвэр, Канадын Жессика Климкаитийг боох мэхээр цэвэр, Францын Хелена Ресевүг вазари үнэлгээгээр ялж их шөвөгт шалгараад Их Британий Некода Смити-Дэвист бох мэхээр ялагдсан. Харин хүрэл медалийн төлөө БНСУ-ын Квон Юү-Ёныг нэмэлт цагт вазари үнэлгээгээр ялснаар ДАШТ-ээс хоёр дахь хүрэл медалиа хүртлээ. Ингэснээр тэрбээр ДАШТ-ээс нэг алт, хоёр хүрэл нийт гурван медаль хүртсэн Монголын цорын ганц жүдоч болж байна. Түүний жинд Японы Цүкаса Ёшида бүх өрсөлдөгчөө цэвэр ялж түрүүлсэн байна.
Харин эрэгтэйчүүдийн 73 кг-ын жинд Будапештийн ДАШТ-ий хүрэл медальт Монгол Улсын гавьяат тамирчин Ганбаатарын Одбаяр “В” хэсэгт Германы Энтони Зинггийг 2:31 минутад цэвэр ялж гараагаа амжилттай эхэлсэн. Гавьяат хоёрдугаар тойрогтоо Узбекистаны Хикматилох Тураевт вазари үнэлгээгээр ялагдаж явсан ч цаг дуусахаас 3 секундын өмнө “иппон”-оор буулгаж авлаа. Улмаар БНСУ-ын Ан Жү-Сүнийг 1:06 минутад хөмрөх мэхээр цэвэр ялснаар шилдэг наймд шалгарсан. Гэвч хэсгийн аваргын төлөө залуучуудын дэлхийн аварга Азербайжаны Хедаят Хейдаровыг вазари үнэлгээгээр ялагдснаар дагах барилдаан хийхээр болсон. Торгуульд манай бөх Казахстаны Заншай Смагуловыг вазари үнэлгээгээр буулгаж авсан ч хүрэл медалийн төлөө Ираны Мохаммед Мохаммедид нэмэлт цагт ялагдаж, хоёр дахиа ДАШТ-ий тавдугаар байрт шалгарлаа. Тэрбээр ДАШТ-д гурван удаа оролцохдоо бүгдэд нь медалийн төлөө өрсөлдөөд байна.
Түүнтэй хамт энэ жинд зодоглосон залуучуудын ДАШТ-ий хошой мөнгөн медальт ОУХМ Цэнд-Очирын Цогтбаатар мөн тавдугаар байрт шалгарсан. Ц.Цогтбаатар эхлээд Португалын Нуно Сараиваг вазаригаар, Тажикстаны Сомон Махмадбековыг нэмэлт цагт вазаригаар буулгаж авсан бол шилдэг наймд үлдхийн төлөө Азербайжаны шигшээ багийн ахлагч, олимп, ДАШТ-ий мөнгөн медальт Рустам Оружовыг хүч шавхсан тулаанд ялсан. Харамсалтай нь манай бөх хэсгийн аваргын төлөө залуучуудын дэлхийн аварга, ДАШТ-ий хошой хүрэл медальт БНСУ-ын Ан Чанримд цэвэр ялагдаж торгуулийн тойрогт хүч үзэхээр болсон. Улмаар торгуульд олимпийн наадмын алт, хүрэл медальт Гүржийн Лаша Шавдатуашвилиг цэвэр ялсан ч Азербайжаны Хедаят Хейдаровт вазари үнэлгээ алдан ялагдал хүлээсэн.
