“Жакарта-Палембанг-2018” Азийн зуны спортын 18-р наадмын тав дахь өдөр Монголын багийн гурав дахь алтан медалийг буудлага спортын төрөлд ОУХМ Ганхуягийн Нандинзаяа эх орондоо авчирлаа. Тэрбээр эмэгтэйчүүдийн 50 м-ийн 3 зайн дасгалд /Суугаа, хэвтээ, босоо/ Азийн наадмын рекорд амжилтыг 1175 оноогоор шинэчлэн тогтоосон бол түүнтэй хамт энэ төрөлд өрсөлдсөн "Инчеон-2014" Азийн наадмын аварга Чулуунбадрахын Нарантуяа 1173 оноогоор дэд байраар финалд шалгарлаа. Улмаар Г.Нандинзаяа финалд Азийн наадмын дээд амжилтыг дахин шинэчлэн тогтоож, 458,8 оноогоор алтан медалийн болзол хангасан бол Ч.Нарантуяа 451,4 оноогоор мөнгөн медаль хүртэж, урт бууны төрөлд монголын буудлага спортын түүхэн амжилт үзүүлээд байна. Тус наадмын урт бууны гурван төрөлд өрсөлдөж буй ОУХМ Г.Нандинзаяа нь багийн холимог буудлагад ОУХМ Н.Баяраагийн хамт шигшээ наймд шалгарсан бол 10 м-ийн дасгалд хүрэл медаль хүртээд байсан юм. Одоогоор манай улс 3 алт, 2 мөнгө, 4 хүрэл медальтайгаар Азийн 45 улсаас 9 дүгээрт эрэмблэгдэж байна.
