БАЛЕТИЙН ОЛОН УЛСЫН ТЭМЦЭЭНЭЭС МОНГОЛ БҮЖИГЧИН АНХ УДАА АЛТАН МЕДАЛЬ ХҮРТЛЭЭ

БНСУ-д 11 дэх удаа зохион байгуулагдсан “Korea International Ballet” 2018 Сөүл хотод зургаадугаар сарын 27-ноос долоодугаар сарын 1-ний хооронд амжилттай болж өндөрлөлөө. Тус тэмцээнд эх орноо төлөөлөн насан хүрэгчдийн ангилалд УДБЭТ-ын гоцлол бүжигчин, СТА О.Анужин амжилттай оролцож алтан медаль хүртсэн байна. Тэмцээнд 14 орны 200 гаруй бүжигчин, 12 орны шүүгч оролцсон бөгөөд олон улсын хэмжээнд 11 дэх жилдээ зохион байгуулагдаж байгаа балетийн А зэрэглэлийн тэмцээн гэдгээрээ онцлогтой. Манай улсад балетийн урлаг үүсч хөгжсөнөөс хойш олон улсын томоохон тэмцээнээс эмэгтэй бүжигчин анх удаа алтан медаль хүртсэн нь Монгол Улсын балетийн түүхэнд нэн шинэ хуудас нээж байгааг олон улсын урлаг судлаачид онцлон бичжээ. О.Анужин нь 2016 онд БНСУ-ын олон улсын тэмцээнээс хүрэл медаль, 2018 онд Монгол Улсад зохион байгуулагдсан Олон улсын анхдугаар балетийн тэмцээнд гран-при шагналыг тус тус хүртээд байсан юм.

Дашрамд сонирхуулахад, Монгол Улсын балетийн түүхэнд Зууны манлай бүжигчин, Ардын жүжигчин Ю.Оюун 1981 онд Москвагийн олон улсын IV тэмцээнээс хүрэл медаль хүртэж байжээ.