Р.АМАРЖАРГАЛ: Энэхүү дотоод сунгааны дүнг яаж ч бодсон хүлээн зөвшөөрөх аргагүй, С.Эрдэнэээс өөр хүн л тодрох ёстой байсан

Ардчилсан намын дотоод сонгуулийн санал хураалт өчигдөр болж, 22.30 цагт дүнгээ танилцуулсан. Цахим санал хураалтад намын гишүүд 53.07 хувийн ирцтэй оролцож, С.Эрдэнэ 1953.05 оноогоор тэргүүлж, Монгол Улсын Ерөнхийлөгчид Ардчилсан намаас нэр дэвшигчээр тодорсон. Тэгвэл энэхүү дүнг хүлээн зөвшөөрөхгүй гэдгээ АН-ын гишүүн Р.Амаржаргал мэдэгджээ. Тэрбээр: 

МЭДЭГДЭЛ

Ардчилсан Намын шударга, үнэт зүйлстэй гишүүд ээ,

АН-ын дотоод сунгаа шударга болно гэдэгт намайг даган мөн итгэж, цахим санал хураалтанд идэхтэй оролцож дэмжсэн та бүхэнд талархал илэрхийлэхийн ялдамд миний бие муу нэр нь хусавч арилахгүй этгээдийн башир аргад өртөж, Ардчилсан намын олон мянган шударга гишүүдийнхээ урмыг хугалсандаа тун харамсан хүлцэл өчье.

Энэхүү дотоод сунгааны дүнг яаж ч бодсон хүлээн зөвшөөрөх аргагүй. Үнэнээр, зөв шударга сонгууль болсон бол С.Эрдэнэ-ээс өөр хүн л тодрох ёстой байсан.

Одоо муу нуухаар сайн илчлэн нэг талдаа гарцгаая. Ардчилсан намд үүссэн өнөөгийн нөхцөл байдлыг сайн муугаараа ялгарах боломж гэж үзэж байна. Ардчилсан Намыг хувь хүний эрх, эрх чөлөө, бизнесийг дэмждэг жинхэнэ баруун төвийн нам болгон шинэчлэх, элдэв популистууд, зүүнтнүүд, луйварчид, завшаанчид зэргээс бүрмөсөн салж, нэг талдаа гарах боломж гэж дүгнэж байна.

Өлзий хутагийн цог бадран, сайн үйлс дэлгэрэх болтугай.

Р.Амаржаргал

2021-05-02