Хорватын нийслэл Загреб хотноо зохион байгуулагдаж байгаа олон улсын жүдо бөхийн холбооны ээлжит Гран При тэмцээний эхний өдөр Монголын баг, тамирчид хоёр хүрэл медаль хүртлээ. Тэмцээний -60 кг-ын жинд Зэвсэгт хүчний "Алдар" спорт хорооны тамирчин ОУХМ Энхтайваний Ариунболд хүрэл медаль хүртэж, Гран При ангилалаас анхны медалиа гардлаа. Тэрбээр эхний тойрогтоо өсвөр үеийн ДАШТ-ий мөнгөн медальт, залуучуудын Европын аварга Азербайжаны Тофиг Маммадовыг 1:58 минутад хоёр вазаригаар, хоёрдугаар тойрогтоо ОХУ-ын Сахават Гаджиевийг нэмэлт цагт вазаригаар, хэсгийн аваргын төлөө Болгарын Валентин Алипиевийг 1:12 минутад цэвэр ялжээ. Улмаар хагас шигшээд алтан медаль хүртсэн Узбекистаны Шарафуддин Лутфиллаевт даралтаар цэвэр ялагдсан бол хүрэл медалийн төлөө Гүржийн Тэмүр Нозадзег илт илүүрхэж цэвэр яллаа.
Э.Ариунболд - Тэмүр Нозадзе
"Загреб-2019" Гран При тэмцээний -66 кг-ын жинд ОУХМ Даваадоржийн Төмөрхүлэг, нутаг нэгт ОУХМ Ганболдын Хэрлэнг ялж, "Анталья-2017" Гран Пригээс хойших анхны Гран Пригийн медалиа гардлаа. Сонирхолтой нь тэрбээр Анатальяд мөн нутаг нэгт ОУХМ Довдонгийн Алтансүхийг ялж, хүрэл медаль хүртэж байжээ. Д.Төмөрхүлэг Загребт эхний тойрогтоо Словакийн Матеж Полякийг 2:54 минутад цэвэр, хоёрдугаар тойрогт Египтийн Мохамед Абделмаугоудийг нэмэлт цагт 5:08 минутад вазаригаар, гурвын даваанд Азербайжаны Ибрахим Алиевийг мөн нэмэлт цагт 5:06 минутад вазари үнэлгээгээр ялсан. Улмаар ¼ шигшээд Риогийн олимпийн тавдугаар байрт Словений Адриан Гомбочийг 7:11 минутад цэвэр ялсан ч хагас шигшээд энэ оны Универсиад наадам болон Парисын “Их дуулга”-ын аварга Молдавын Денис Вьеруд даралтаар ялагдлаа. Улмаар хүрэл медалийн төлөө Г.Хэрлэнг торгуулиар ялж, Гран При ангилалаас тав дахь хүрэл медалиа хүртжээ.
Харин “Монреал-2019”, “Будапешт-2019” тэмцээнүүдэд дараалан түрүүлээд байсан Г.Хэрлэн тавдугаар байрт шалгарч чансаагаа нэг байраар ахиулж, дэлхийд #6-д бичигдэхээр боллоо.
Г.Хэрлэн - Д.Төмөрхүлэг
Мөн Казахстаны нэрийн өмнөөс барилдаж буй манай ОУХМ Галбадрахын Отгонцэцэг Загребт өрсөлдөгч бүрээ цэвэр ялсаар алтан медаль хүртлээ.
Г.Отгонцэцэг /Казахстан/- Мелани Клемент /Франц/