УБТЗ хувь нийлүүлсэн нийгэмлэгийн удирдлагууд авлигын хэрэг үйлдсэн байж болзошгүй талаар МТЗ-ын нэгдсэн холбооны удирдах зөвлөлийн гишүүн Ж.Мөнхбат, Б.Аюуш нар хэдхэн хоногийн өмнө мэдээлж байсан. Ингэхдээ тэд УБТЗ хувь нийлүүлсэн нийгэмлэгийн удирдлагууд төмөр замыг өргөж засварладаг ВПРС гэх машиныг ОХУ-аас худалдаж авахдаа оффшор компаниар дамжуулж мөнгө угаасан гэсэн бөгөөд үүнд УБТЗ-ын дарга Д.Жигжиднямааг буруутгаж байсан юм.
Тэгвэл МХЕГ-аас тус байгууллагад хоёр удаа шалгалт хийх гэхэд нь УБТЗ ХНН-ийн дарга Д.Жигжиднямаа татгалзжээ. Өчигдөр л гэхэд МХЕГ-ынхан Зам тээврийн яаманд хандаж, УБТЕ ХНН-т шалгалт хийх хүсэлт тавьж, зөвшөөрөл авсан байна. Улмаар өчигдөр гэнэтийн шалгалт хийхээр очсон ч тус нийгэмлэгийн дарга Д.Жигжиднямаа шалгалт оруулахыг зөвшөөрсөн ч байгууллагынхаа санхүүг шалгуулахгүй гэж татгалзжээ.
МХЕГ-ын Хөдөлмөрийн аюулгүй ажиллагааны хэлтсийн дарга Г.Эрдэнэтөгс энэ тухай “Улаанбаатар төмөр зам” ХНН-ийг сүүлийн таван жил шалгаагүй. Мөн сүүлийн хоёр жилд их хэмжээний аваар осол гарсан. Манай үнэлгээгээр өндөр эрсдэлтэйд тооцогдож байгаа. Сүүлийн хоёр жилд УБТЗ-д 62 осол гарсан. Үүний 22-ийг нь л үйлдвэрийнх гэж бүртгүүлсэн байна. Үүний цаана олон хүний амьдрал яригдана. Төлөвлөгөөт шалгалт явуулах гэхэд УБТЗ-ын дарга Д.Жигжиднямаа нь хоёр удаа татгалзсан хариу өгсөн. Ингээд Зам тээврийн хөгжлийн яамнаас зөвшөөрөл аваад өнөөдөр шалгалт хийж байна. Өнөөдөр Д.Жигжиднямаа дарга шалгалт явуулахыг зөвшөөрсөн ч санхүүгээ шалгуулахгүй гэж байна” хэмээсэн юм.
Дашрамд мэдээлэхэд, сүүлийн үед Д.Жигжиднямаатай холбоотой өмч хөрөнгийн асуудал олон дуулдаж байгаа. Тухайлбал, түүнийг 1.2 сая ам.долларын үнэтэй боловч зам засварын ВПРС машиныг 1.7 сая ам.доллараар худалдаж авсан. Үүнээс гадна, УБТЗ арван жилийн өмнө 16 ширхэг суудлын вагоныг 17 тэрбум төгрөгөөр худалдаж авсныг Д.Жигжиднямаа дахин 16 тэрбум төгрөгөөр засуулсан, ОХУ-ын актлагдсан 1000 вагоныг худалдан авч мөнгө угаасан гэх мэт олон асуудал байдаг бөгөөд заримыг нь хуулийн байгууллага шалгаж байгаа юм.
