Ардын уран зохиолч Пунцагийн Бадарчийн “Есөн эрдэнийн орон” найраглалд Төрийн соёрхол хүртээлээ

Тулгар төрийн 2228 жил, Их Монгол Улс байгуулагдсаны 813 жил, Үндэсний эрх чөлөө, тусгаар тогтнолоо сэргээн мандуулсны 108 жил, Ардын хувьсгалын 98 жил, Ардчилсан хувьсгалын 30 жил, Монголын уламжлалт сар шинийн баяр Цагаан сарыг тохиолдуулан Монгол Улсын Ерөнхийлөгч Х.Баттулга “Төрийн шагнал хүртээх тухай” зарлиг гаргалаа.

ЗАРЛИГТ:

 “…Монгол түмний сэтгэл зүрхэнд хоногшиж, үеэс үед дуурьсах гарамгай бүтээлүүдийг туурвин урлаг, уран зохиолын боловсрол, гоо зүй, танин мэдэхүй, соён гэгээрлийн гарамгай үйлсийг бүтээж, Монголын уран зохиолын хөгжил, яруу найргийн туурвил зүй, оюун санааны дэвшилд оруулсан үнэтэй хувь нэмрийг нь соёрхон үнэлж, үндэсний уламжлал бэлгэдлийг эх орныхоо байгаль, түүх, соёл, ахуйд уялдуулан шингээж, ард иргэд, залуу хойч үедээ эрх чөлөө, тусгаар тогтнол, эх орныхоо эгнэшгүй үнэ цэн, яруу гайхамшгийг таниулсан “Есөн эрдэнийн орон” найраглал туурвисан Монгол Улсын Ардын Уран зохиолч Пунцагийн Бадарчид Монгол Улсын Төрийн шагнал хүртээсүгэй” гэжээ.

Төрийн шагнал хүртээх тухай Монгол Улсын Ерөнхийлөгчийн зарлигийг уншиж сонордуулсны дараа Монгол Улсын Ерөнхийлөгч Х.Баттулга Төрийн соёрхлыг Ардын уран зохиолч Пунцагийн Бадарчид гардуулж, үг хэллээ.

МОНГОЛ УЛСЫН ЕРӨНХИЙЛӨГЧ Х.БАТТУЛГА:Мөнх тэнгэрийн хүчин дор Монголын урлаг соёл дэлгэрч,

авьяас билэгтнүүд урлан туурвих нь өргөн болох болтугай

“Билгийн тооллын шинийн нэгэн, Сар шинийн баярын босгон дээр Ардын уран зохиолч Пунцагийн Бадарч гуай Төрийн шагналыг хүртэж байна.

Монгол хүн бүр П.Бадарч гуайн шүлэг, найраглалуудыг уншиж өссөн, эх хэлнийхээ яруу сайхныг түүний бүтээлүүдээс мэдэрдэг болсон гэхэд эргэлзэх, маргалдах хүн байхгүй биз ээ. 1976 онд П.Бадарчийн “Есөн эрдэнийн орон” найраглал Ерөнхий боловсролын сургуулийн сурах бичигт орсон байдаг агаад энэ бүтээлээр хүүхэд багачууд эх орноо хайрлах анхдагч сэтгэхүй, мэдрэмжээ олж авдаг юм.

П.Бадарч гуайн хийсэн бүтээсэн зүйлс нь олны нүдэнд илхэн, номонд шингэж, ардынхаа сэтгэлд хоногшсон тул би илүүг тоочиж цаг барах нь илүүц биз.

Ингээд Төрийн шагнал хүртсэн П.Бадарч гуай танд эрүүл энх урт удаан насалж, ихийг бүтээхийг ерөөе. Миний эх орон авьяас эрдэнийн билээ.

Мөнх тэнгэрийн хүчин дор Монголын урлаг соёл дэлгэрч, авьяас билэгтнүүд урлан туурвих нь өргөн болох болтугай” гэв.

Ардын уран зохиолч П.Бадарч гуай Төрийн соёрхол хүртсэнийхээ дараа Есөн эрдэнийн орон найраглалаа хэрхэн бичих болсон талаараа дурсан ярьж,

“…Илч гэрлийн гайхамшиг мандсан нар алтан билээ

Энгүй өргөн талын шимт хөрсөнд төлжиж

Эрдэнийн түрүү сугсруулсан амуу тариа алтан билээ

Энэ сайхан Монголын удам залгасан бүл

Энхрий хос амрагийн дурсгалын бөгж нь алтан билээ

Энэрэлт төрийн далбаанд эгнэгт өнгөлөг гялалзсан

Эрдэнийн соёмбо үсэг

Элэгдэшгүй алтан билээ

Авралын гэгээн нар нь алтан

Ачит төрийн сүлд нь алтан

Арвайн түмэн түрүү нь алтан

Амраг хосын дурсгал нь алтан

Миний эх орон алтан эрдэнийн билээ…” хэмээн шүлэглэлээ.

П.Бадарч: “Морьд” найраглалаараа би Монголын утга зохиолд морьтой ирсэн найрагч гэдэг нэр авсан

Ардын уран зохиолч Пунцагийн Бадарч энэ үеэр баярын сэтгэгдлээ ийн хуваалцлаа. Тэрбээр "Олон жил бодож байсан. Би Төрийн соёрхол шагналд гурван удаа дэвшиж дөрөв дахь дээрээ энэ сайхан шагналыг авлаа. Монгол төрийнхөө хойморт Ерөнхийлөгч Х.Баттулгад баярлаж байгаагаа илэрхийлье. Миний энэ шагналыг Ерөнхийлөгч, Тамгын газрын газрын даргаас гадна ард түмэн  “Есөн эрдэнийн орон”  найраглалд дуртай учраас  энэ шагналд бүх хүн дуртай байгаа гэдэгт би баярлаж байна. Маш олон хүн надад утсаар баяр хүргэж,  дахин сайхан бүтээл туурвиарай гэж хэлсэнд нь би баярлаж байна. Миний анхны шүлэг Үнэн, Хөдөлмөр сонинд нийтлэгдэж, тухайн үеийн тогтмол хэвлэлүүдэд гарч байсан.  “Морьд” найраглал нэртэй  анхны ном маань 1967 онд гарсан. “Морьд” найраглалаараа би Монголын утга зохиолд морьтой ирсэн найрагч гэдэг нэр авсан. Монголын ард түмэн моринд хайртай учраас энэхүү бүтээл маань  сэтгэлд нь илүү хүрсэн болов уу. Сэтгэгдэл маш өндөр байна” гэлээ.

Дашрамд мэдээлэхэд. Төрийн соёрхолт П.Бадарч нь Төв аймгийн Баянжаргалан суманд 1939 оны наймдугаар сарын 17-нд төржээ. 1960 оноос уран бvтээлээ эхэлж  “Морьд” , “Есөн эрдэнийн орон” , “Алтан тоос”, “Зургаан мөнгөн мичид”,  “Ширхэг цагаан сувд” , “Хэрлэн” зэрэг яруу найргийн ном хэвлvvлжээ. 1981 онд "Эх орны хилээс эх орондоо хэлэх үг" "Байтагийн чулуу" "Хилийн тэнгэр цэлмэг байгаасай" "Цэрэг эх орны дуулал" дууны шүлгээрээ Монголын Зохиолчдын Эвлэлийн шагнал, 1988 онд "Есөн эрдэнийн орон" найраглалаараа Д.Нацагдоржийн шагнал ,1999 онд СГЗ, 2005 онд Ардын уран зохиолч цол хvртжээ.

Эх сурвалж: president.mn